Ini dongeng punye cerite …. Alkisah bang Anwar anaknya, kong Talip sudeh jadi orang besar dengan pangkat besar. Kate orang-orang die jadi direktur di satu perusahaan airlines nyang beken. Tinggalnya udeh dirumeh gede di Menteng. Mobilnya keren abis.
Atu hari bang Anwar nengok kong Talip babenya. Seluruh kampung heboh. Mpok Fatime langsung narik anak gadisnye nyang botoh banget, si Juleha. Emang sih, di gang tempat kong Talip tinggal, Juleha ibaratnya kembang dan primdona. Kalu lenong, ngak ade Juleha, pasti batal mentas. Juleha pokoknye cakep abis deh. Tinggal dibedakin dikit same pake lipstick semue bintang sinetron minggir semue. Kalah cakep sama Juleha.
Begitu ketemu bang Anwar, langsung aje Mpok Fatime berkoar : “Bang tolongin anak perawan aye dong. Si Juleha nih, pengen jadi pramugari – kerje diatas pesawat”. Bang Anwar begitu liat si Juleha, mesem-mesem doang. Jakun ditenggorokan-nya naik turun kaya eskalator di mall. Dalem ati, bang Anwar ngaku juge kalu Juleha emang kinclong.
Singkat cerita akhirnya Juleha diterima juge jadi pramugari. Selesai training, Juleha langsung dapet tugas luar negeri. Dan harus pule nginep di Singapura. Nah, seumur-umur Juleha ngak pernah kemane-mane, keluar gang rumah aje, nyak dan babenya udeh kuatir banget. Jadi pas tugas keluar negeri begitu, nyak dan babenya deg-deg-an banget. Jantung rasanya mau lompat keluar. Bagus pilot yang tugas bareng Juleha, si Farid kebetulan anak Betawi dari Kramat Sentiong. Dan engkongnya terkenal sebagai ketua RW nyang soleh, bersih dan ngak pernah korup. Jadi si Juleha ceritenya dititipin sama si Farid.
Farid emang anak baik. Dengan telaten dan teliti, die menjelaskan semuanya kepade si Juleha. Ade kali ampe 2 jam ngejelasin-nye. Ampe Juleha ngos-ngos-an mangut-mangut. Akhir cerite si Juleha abis tugas nginep deh di hotel, sendirian satu kamar. Besok paginya pas jam delapan dan mau ke airport, Juleha belom juge nongol di lobby. Farid kebingungan, dan die telpon Juleha dikamarnya.
“Halloooo” saut Juleha. “Mpok, telat bangun ? Semua sudah nunggu nih di lobby !”. Juleha menjawab dengan suara panik, “Bukan gitu kapten. Aye sih udeh siap dari tadi. Udeh mandi dan udeh dandan. Cuma aye binggung keluarnya lewat mane ?” Farid ampir pingsan ngak kuat menahan ketawa.”Yah….mpok. Keluarnya lewat pintu dong !” “Kalu itu Juleha paham kapten, tapi lewat pintu yang mane ?” Mendengar jawaban itu, Farid jadi bingung banget, dan nyeletuk “Emang pintunye ade berape mpok ?” Juleha menjawab dengan polos “ …. Ada tiga kapten” “Terus …..?”, Farid mulai penasaran dan ngak sabar. “Iye, pintu pertama pintu kamar mandi. Pintu kedua pintu lemari pakaian.” “Nah, ….. pintu nyang terakhir mpok”, Farid mulai ngak sabaran. Juleha terdengar bingung dan bimbang, “tapi kapten ….. pintu ketiga ade tulisannya bahasa Inggris … DO NOT DISTURB… itu kan artinya ngak boleh diganggu, bukan? Lha aye mesti lewat pintu mana dong ????” Mendengar jawaban itu mata Farid langsung berkunang-kunang. Dan ‘gedebuk’… Farid pingsan. Ngak kuat ..... (ha...ha...ha...ha....)
No comments:
Post a Comment