Kong Talip, kaget bukan maen, … waktu Juleha masuk kerumeh dengan nafas ngos-ngos-an kayak kude baru dikebiri. Keringet bercucuran kaye es Loly meleleh. “Buset…dah…Jule-jule ….. nape loe ? Kayak kambing terbirit-birit begitu. Emang kuntilanak mane yang nguber elu ?”
Nafas Juleha tetep ngos-ngosan kayak lokomotip atret. Ngak jelas ngomongnya. Baru deh pas abis minum seember air, Juleha tenang dan bisa cerite. “Itu… kong, aye kan tadi lewat samping kuburan, pulang dari warung Mpok Fatime. Beli rokok linting engkong.” Kong Talip, ngak sabar : “Iye …. terus ade ape ?” “Nah, pas ditikungan kuburan, sekilas aye liat ade cowok ngikutin aye, kong….” “Huh….. ape lu kate ?”, Kong Talip mulai mendelik matenye, “Siape tuh manusie nyang kaga takut mati ? Ape die ngak kenal si Talip … Jawara Rawa Buaye ?”. “Aye takut banget kong, pan sepi banget. Aye takut diperkose !”, Juleha manasin kong Talip. “…Trrrussss…… ape kejadian-nya ?” kate kong Talip sembari balikin pecinya (artinya kong Talip siap tempur)
“Yah, kong saking takutnye aye lari aje…..”, timpal Juleha. “Bagus…. Elu kabur. Pan elu juare lompat karung 17 Agustus. …. He…..he….he….. mane die sanggup nguber elu, Jule ?”, kate kong Talip bangge. Juleha matenya lirak-lirik, terus ngomong : “Nah, tuh die kong. Pas aye lari, ternyate die juga lari nguber aye !!!”. Kong Talip mendelik lagi, “Buset kurang ajar banget tuh anak !!” Akhirnya lirih Juleha ngomong juga, “Terus aye ketangkep kong ama tuh cowok. Larinye lumayan kenceng”. Mendengar itu kong Talip balik sewot, “Abis …. Ape yang terjadi, Jule ?”. “Aye ngak ade jalan lagi kong. Terpaksa aye angkat rok aye tinggi-tinggi”. Muke kong Talip merah membara, bakiak sudah pindah dari kaki ke tangan, “Kurang ajar …..” Eh, Juleha masih nimpalin “Pas aye angkat rok aye tinggi-tinggi, ….. eh tuh cowok, malah melorotin celana jins-nye”
Kong Talip yang balik sekarang ngos-ngos-an mendengar cerita si Juleha. “Waduh….. abis dong elu diperkose tuh cowok.” Juleha sambil melengos dan senyam senyum akhirnye berkate : “Yah…. Enggak sih kong. Abis itu aye lari lagi makin cepet. Untung tuh cowok, celananya sudah melorot, jadi waktu mau lari ngejar aye, die ngejungkel…. Ngak bisa lari !!!” (Ternyate Juleha pinter banget dah !!)
Mendengar akhir cerita, bakiak ditangan kong Talip mampir dijidat Juleha, dan kong Talip mareh-mareh “Juleha-juleha, tega lu yah … ampir bikin jantung gue putus !!” Juleha ketawa aje, biarpun jidat rada benjol dicium bakiak.
No comments:
Post a Comment