Ini dongeng berlanjut …… Konon di kampung, ade perawan bahenol nyang kinclong. Boleh di-ibarat-ken mawar mewangi nan merekah. Namenye Ipeh. Jadi jangan heran kalu jejake nyang ngantri luar biase banyaknye. Melebihi ngantri bensin. Akhirnye setelah melalui berbagai seleksi nyang luer biase ketatnya, Ipeh berhasil dipersunting ame Tohir. Anak juragan areng, nyang paling sohor seantero Pejaten.
Perkawinan Ipeh dan Tohir merieh bukan maen. Melebihi kampanye. Pake segale macem, lenong, ronggeng, layar tancep dan juge dang-dut. Mertue Ipeh, sangking bangga dan sayangnye, menghadiahkan mobil BMW seri 323 nyang paling baru dan anyar. Warne-nya gile banget - merah cabe. Bikin semue orang ngiler melihatnye.
Suatu hari Ipeh nyetir tuh BMW dijalan tol. Karene ujan, dan juge Ipeh belum mahir-mahir banget, jadi deh tuh BMW nyeruduk dan nyium truk ayam dari Kramat Djati. Ringsek abis deh BMW-nye. Dan nyang pareh Ipeh muke-nye ikut luka. Melihat situasi gawat, sang mertue mendatangkan ahli bedah plastik nyang paling sohor dari Hollywood. Nyang udeh beken bikin Michael Jackson dari kulitnye item ampe jadi putih kaye bedak pelitur.
Pas ‘ntu dokter dateng dan merikse kondisi Ipeh, ternyate Ipeh masih bisa disembuhkan asal harus cangkok kulit. Semue keluarge lega bukan maen. Tapi tuh dokter punye permintaan khusus. Die cuma mau ngomong ame Tohir. Itupun bisik-bisik. Pokoknye rahasie banget dah. Ketike die berbisik dikuping Tohir, tentang permintaan-nye itu, Tohir matenye ampir lompat keluar. Muke Tohir pucat abis. Mukenya lebih putih dari kertas koran. Seolah-olah permintaan tuh dokter mustahil deh ! Tapi ape boleh buat karene Tohir cinte mati same Ipeh, maka akhirnya Tohir manggut-manggut aje. Artinye Tohir setuju. Ape-pun permintaan tuh dokter.
6 bulan setelah perawatan, dan Ipeh diperbolehken pulang, seluruh kampung gempar. Karena Ipeh kelihatan jauh lebih cantik dan kemayu. Melebihi artis sinetron dan dang dut manapun. Ampe-ampe koran, majalah dan infotainment parkir semue di kampung meliput. Lebih heboh dari dukun anak Ponari tempo hari. Semua tamu nyang dateng terpesona dan kagum. Kulit muke Ipeh keliatan seger, putih bersih, berkilat, kinclong abis, seperti kulit bayi. Nyang gile semua orang begitu melihat Ipeh, pade gemes, mulai dari yang pengen megang, ampe nyubit dan nyium segale. Termasuk emak si Ipeh, nyang terus menerus nyiumin pipi si Ipeh setiap kali ketemu.
Anehnya, Tohir selalu menahan ketawe setiap kali emak si Ipeh nyium pipi si Ipeh. Mula-mula Ipeh merase senang-senang aje. Tapi lame-lame dia penasaran juge. Kok, lakinye si Tohir bersikap aneh begitu.
Malem hari pas mau tidur, Ipeh dan Tohir berdua-an doang di ranjang. Ipeh penasaran bertanye, “Bang, …. Kok setiap kali nyak nyium pipi aye….. Bang Tohir girang banget kayak kena lotere ?”. Tohir kaget juge ditanya begitu. “Yah, pan abang bahagie melihat Ipeh cantik dan nyak sayang sama Ipeh.” Tapi Ipeh punye firasat lain, “Ah… abang bohong deh. Pasti ade ape-apenya. Ayo dong bang aye di kasih tau rahasianye ….” kate Ipeh merajuk manja. Akhirnya Tohir ngak tahan juge, dan rahasia itu dibisikin juge kekuping Ipeh. Abis denger bisikan Tohir, muke Ipeh kelihatan kenceng dan marah banget, “buset …… abang Tohir….. pantes aje selalu cengar cengir gitu. Durhaka tau …… ” … dan ‘bak-bik-buk’ … Tohir ancur banget digebukin bertubi-tubi ame bantal dua biji.
( he…he…he…. rupanye waktu Ipeh di rumah sakit dan tuh dokter minta cangkok kulit. Die minte kulit nyang spesial banget. Yaitu kulit dari pantat si Tohir. Pantes aje Tohir menahan ketawa setiap kali nyak si Ipeh nyium pipinya. Pan, same aje nyak si Ipeh nyium pantat Tohir. ….. duh Tohir memang durhaka deh)
No comments:
Post a Comment