FARID BERTANYA ..... "EMANG TUHAN ITU ADE ??"

Ini dongeng punye cerite …… Alkiseh, suatu hari si FARID uring-uringan. Muke-nye manyun kaya kue mangkok terbalik dan kehabisan kelape parutan. Kata emaknya si FARID, sih dia baru apes kena di PHK ditempatnye jadi satpam. Di perusahaan itu emang lagi runyam. Ade program pengurangan pegawai. Maklum kate koran ekonomi lagi resesi.

Lagi luntang-lantung gitu, akhirnya kong Talip ngak tega. Dipanggil-lah si FARID sembari di ajek ngupi. Kong Talip sembari nyender di kursi, ngerokok kretek, asyik banget, “Kenape lu, Rid ? Kaya bongsang kena angin puyuh. Melayang ngak ade juntrungan-nye” FARID sambil menghela nafas, mengeluh, “Aye, mau protes sama Tuhan, kong. Dia ngak adil. Mase nasib aye dibikin jelek begini. Jangan-jangan Tuhan tuh ngak ade !!!!”

Kong Talip langsung mendelik, dan “keeepllloooook”, pipi si FARID nyang manyun ditabok kong Talip. FARID kaget setengah mati. “Duh, kong…. Jangan marah gitu dong. Masa aye ditabok sampe sakit begini” Sembari nunjuk jidat si FARID, kong Talip berkoar, “Berasa sakit-kan loe ?” FARID sembari megangin pipinya, protes, “Yah…. sakit kong. Naboknya kenceng banget dah. Emang aye salah ape sih ?”

Kong Talip, menghela nafas panjang sembari batuk-batuk dikit. “Rid, kalu elu berase sakit. Coba elu gambarkan ame gue wujud rase sakit itu” FARID balik keheranan. “Kong Talip, mabok tembako yeeeeh. Rasa sakit mane bisa aye gambarin wujudnya. Cuma bisa dirasakan, kong. Sakit !!!”. Kong Talip sembari senyum die ngomong : “Sama tuh FARID, ….. Tuhan itu juge ngak bisa elu pertanyakan wujudnya. Tapi kalu iman elu kuat, maka Tuhan bisa elu rasakan ada didalem dada elu. Mangkenya jangan sekali-kali mempertanyakan keberadaan Tuhan. Artinya iman elu tipis.” Mendengar penjelasan itu FARID cuma manggut-manggut tanda die mulai eling.

Lanjut Kong Talip, “Elu juge ngak nyangka-kan bakalan gue tabok ?” FARID sembari nyengir-ngyengir bajing membalas, “Yah, enggak lah kong. Aye mah pikir bakalan dikasih duit. Eh… taunya malah ditabok kong Talip.” Sembari ngakak kong Talip ngerogoh dompet dan die kasih si FARID “cepe-ceng” alias seratus ribu rupiah. “FARID….FARID, kalu iman elu kuat dan elu eling, pasti elu bakalan ngak bisa gue tabok. Elu pasti sempat menghindar. Tuhan, tuh ngak pernah memberikan kita nasib nyang jelek. Die maha penyayang dan pengasih. Kite selalu dikasih kesempatan yang cukup. Cuma kadang elu ngak eling dan ngak siap. Semua kesempatan itu selalu hilang begitu saja.”

FARID cuma bisa mengangguk-angguk kaya beo. Ngak disangka dibalik tabokan kong Talip yang sakit itu - ade pelajaran maut yang sungguh manjur buat kehidupan.