KONG TALIP ... KORBAN DESPERATE HOUSEWIVES

Ini dongeng punye cerite ….. Gare-gare sinetron “DESPERATE HOUSEWIVES”, kampung kong Talip heboh. Mulai dari perawan, sampe nenek-nenek semuenye getol nonton tuh sinetron tentang tetangge nyang pada rese. Sinetron itu berase pas, mungkin karene ceritenye juga menyentuh kehidupan di kampung kong Talip, dimane tetangge saling gosip dan rese bersama-an.

Suatu hari, pas kong Talip lagi duduk bengong sembari nyeruput kopi tubruk. Bini-nye tiba-tiba dateng mesra nge-gelendot sama kong Talip. Langsung deh, kong Talip sewot. Die paham betul ame laga lagu bini-nye. Pasti ade mau-nye deh ! “Bang…….” mesra banget bininya kong Talip merajuk. Suarenye mirip cucakrawe pengen merindukan bulan. Kong Talip cuma monyong doang bibirnya. “Abang …. kan sayang dan cinte ye sama aye … ye?” lanjut bini kong Talip persis seperti di film “DESPERATE HOUSEWIVES”. Kong Talip mulai jaga-jaga, serangan semakin serius, “Yah, sayang dong…. Kalu ngak masa cucu kite udah sampe selusin gitu ?”. Bini kong Talip nyengir, karena jebakan-nya mulai kena. “Abang tau kan….. minggu depan ulang tahun aye….” “Emang kenape ? Pengen manggil lenong ?” kong Talip mulai sesek nafas. “Ngak sih, … aye cuma pengen kado spesial aje” “Ape tuh ? Gue ngak ngarti deh !” kong Talip ngeles dan belaga pilon. Bini kong Talip nyengir semakin gede, terus berbisik ditelinga kong Talip. Abis dibisikin kong Talip melotot, “Gile …… Buset lu ngak sadar ape ? Ngaca dong ? Elu udah nenek-nenek ” suare kong Talip semakin tinggi, kayak klakson Kopaja. Bini kong Talip langsung cemberut dan ngancem, “Bodo…. Pokoknye kalu aye ….. ngak dibeli-in, aye mogok masak” dan angkat badan meninggalkan kong Talip. Diancem gitu kong Talip atinye ciut juge.

Rupe-nye bini kong Talip, saking nge-fans-nye same “DESPERATE HOUSEWIVES” minte dibeli-in BH yang ade renda-renda-nya persis seperti nyang die liat di film. Terpakse deh besoknya kong Talip pergi juge ke Senayan nyari tuh BH pesenan bininya. Celakanya die ngak pernah beli gituan. Bingung dan pusing bukan maen. Kakinya gemeter sejak dari Busway.

Pas udah nyampe di toko, kong Talip bingung banget. Bukan kakinya aje nyang gemeter, bibir ame matenya juga ikut gemeter. Nah, tuh toko jualan BH sampe seabrek-abrek banyaknya. Kong Talip jelas bingung milihnya. Lagi kong Talip celingak celinguk kebingungan, tiba-tiba ade suare merdu banget menyape, “Babe kok bingung seh ….. pengen nyari ape, beh ?” seorang perempuan cantik dan bahenol menyape kong Talip. Kong Talip nyengir-nyengir kaye kude mau sikat gigi. Terus saking malunye, kong Talip berbisik di kuping sang SPG nyang cantik itu. Sang SPG sempet kaget juge denger bisikan kong Talip. Tapi die terus tersenyum dan mengajak kong Talip kebagian BH nyang semuanye pake renda-renda. Kong Talip makin bingung ngak tau harus beli nyang mane ? Saking banyak-nye. Terus tuh SPG dengan suara manja dan genit, bilang “Babe tau ngak ukuran-nye ?” Kong Talip nyengir lagi dan geleng-geleng. Tapi rupanye sang SPG sudah sangat pengalaman. Sambil senyum manis banget, dia bilang, “Babe kire-kire ye. Apa ukurannya kayak jeruk bali ?” Kong Talip geleng-geleng kayak komidi puter. “Ape segede apel malang ?” Kong Talip masih menggeleng. Binggung juga nih SPG, “Gimane kalu segede jeruk Sunkist ?” Masih juga kong Talip menggeleng. “Mungkin…… segede telor bebek ?” Kong Talip terlihat girang, dan sumringah, dia manggut-manggut tanda setuju. Sang SPG girang juge, karena akhirnya ukurannya ketemu.

Pas sang SPG mau milih BH yang sesuai ukuran, tiba-tiba kong Talip berbisik lagi, “Tapi,….. mpok…. telor bebeknya didadar ye !” Sang SPG kaget bukan main, dan mukenya pucet ngak tau mesti ngomong ape.