FARID dan 3 JANDE

Ape mau dikate … cume koran doang nyang bilang ekonomi bangun tidur dan melek lagi. Kenyataan di kampung Farid, idup masih aje tetep suseh. Dan Farid tetep merane jadi pengangguran. Biarpun pemilu ude selesai, nasib belum juge berobah.

Alkiseh ….. Suatu hari ade juge angin semilir bertiup. Di ujung gang, rumah kosong Cak Munir, akhirnye di kontrak orang. Orangnye tinggi besar, ganteng, mirip dikit ame Brad Pitt, dan kebetulan juge seorang dokter. Namenye Dokter Apul. Kate Cak Munir sih baru pindeh dari Sumatera. Dokter Apul hobinye mancing dan lagak-lagu-nya rada males praktek dokter. Itu sebabnye waktu Farid ngelamar kerja, langsung diterime dan dijadikan asisten atau mantri.

Seminggu kerje di Dr. Apul, Farid rade-rade betah. Maklum pasien Dr. Apul kebanyakan perempuan semue. Soale, Dr. Apul rada-rada ganteng menggoda. Masih bujang pula. Neh, ape dikate…. Suatu ari, Dr. Apul gatel pengen mancing. Die bolos praktek deh, dan praktek dititipken ke Farid, dengan sejumlah instruksi kalu-kalu ade pasien darurat. Farid cengar-cengir aje. Dalam ati die nge-batin gumbire banget … “ini die kesempatan gue buat maen dokter-dokteran”.

Menjelang magrib, Dr Apul balik. Lumayan juge, pulang sembari nenteng ikan lele 5 biji. Tau deh, die mancing di kali nyang mane ? Teyus, Dr. Apul interview Farid. “Ade ? Pasien ndak, Rid ?”. Farid nyengir, “Ade dok, tige. Tapi semuenye ude aye urus. Beres dok !”. Dr Apul manggut-manggut seperti beo abis sarapan pepaye. “Nah, Rid… elu cerite deh atu demi atu”.

Farid, narik nafas dalem-dalem. “Gini, dok. Nyang pertame, Mpok Ani, nyang jande di gang sebelah. Die dateng sembari buka baju dan nunjukin punggung-nye belang-belang abis dikerokin.” Dr. Apul matanya mulai meler dikit, “Terus elu apain Rid ???”. Farid nyengir, “Itu sih… masalah sepele dok …. pan nyak aye juga suka begitu. Aye kasih aje Antangin ! Beres deh” Dr. Apul mukanye rada asem, tapi dia manggut-manggut juge akhirnya.

Farid tambah semangat, dan nerusin cerite, “Nah…. Nyang kedue, itu …. Mpok Romlah !” Dr. Apul matenya langsung melintir kedut-kedut, maklum Mpok Romlah itu jande kembang nyang beken menyebar ke seantero 12 kampung. Cantik, bahenol, dan bekas caddy di lapangan golf. “Mpok Romlah, dateng sembari buka baju dan ngasih lihat perut ame udelnya !” cetus Farid tanpa emosi. Dr. Apul sudah mulai keluar keringet. Matenya lompat-lompat kayak ikan koki. “Terus…. terus …… terus elu apain, Rid ???? ” Farid jawab enteng, “Aye ngak tahan dok !”. Dr. Apul mulai ngak sabaran, “Apenye …. nyang elu kagak tahan ???” Farid lanjut, “Perutnya sih mulus deh …. tapi aye ngak tahan ….. Mpok Romlah, kentut mulu. Bau banget deh. Rupanye perutnye kembung dok.” Dr. Apul mulai nepok-nepok jidatnya, “Nah, elu kasih ape tuh si Romlah ?” Farid lanjut nyengir,”…. pan ini juga sepele dok. Nyak aye juga suka kembung begini. Yah, aye kasih Antangin lagi. Ame perut mpok Romlah aye borehin bawang merah. Beres deh, angin-nye mabur semue” Dr. Apul mukenye mulai kenceng kaye buah sirsak.

Ngak lame kemudian, Farid garuk-garuk kuping, nyeletuk juge, “Nyang aye agak bingung adalah kasus Mpok Jumile…..@#$%^&* ????” Mendengar sebutan Mpok Jumile, Dr. Apul mate-nye bukan lagi melintir tapi udeh mendelik, dan jantungnye rade-rade ngebut. Dag-dig-dug kaye bedug malem takbiran. Soale Mpok Jumile, itu biang-nye jande. Udah kawin 4 kali, cantik bukan maen, sexy dan hartanye segubrak banyak-nye. Dr. Apul langsung tanya “Kenape tuh Mpok Jumile …. ????”

Ganti bukan lagi garuk-garu kuping, Farid garuk-garuk kepale ….”tadi mpok Jumile, dateng kemari, matanya merah semua, nangis ngak keruan .. @#$%^&*” “Lha, terus ….”Dr. Apul kehilangan kesabaran. “Yaaah… aye suruh masuk ke ruang praktek dokter…” Dr. Apul napasnya mulai kaya kude, “Teruuuussss …..” “Mpok Jumile, langsung buka baju …. Telanjang deh, … bugil abis ”, Farid menjelaskan. “Haaaaahhhh…. @#$%^&*”, Dr Apul mulai senewen. “Lha, aye tanya keluhan-nye ape gitu….”Farid pasang aksi kayak dokter beneran.

Dr. Apul ngak bisa lagi ngomong, cuma napasnya nyang mendengus kayak lokomotif kerete di Beos. “Eh, dengan mata merah …. sembari mewek, … Mpok Jamile bilang dia sudah ngak tahan hidup tanpa lelaki.” Dr. Apul sudah seperti layangan singit. “Terus, …. nyang aneh ….. Mpok Jumile naik ke ranjang dan langsung celentang …… kaya orang pasrah gitu” Farid muke-nye makin bingung. Dr. Apul mulai sengit dan singit, “ Teruuuussss, …. Rid …. Elu apa-in tuh …. Mpok Jumile ???” Farid dengan muka bodo menjawab “nah, itu nyang bikin aye bingung dok …. Akhirnya yaah…. Aye ambil INSTO deh, …. mata merah Mpok Jumile aye tetesin INSTO deh, biar adem”

Tanpa pikir panjang, Dr. Apul maju dan mencekik leher Farid. Dan … “eeehhhhkkk…” cuma suara itu yang keluar dari mulut Farid.